In morte della lirica

L’è morta “circondata
da l’affetto dei suoi cari”,
sconvolti e sconcertàdi
da na tristessa sensa pari.
L’è morta de sti giorni
“dopo lunga malattia”,
massacrà e copà dai barbari
che ne l’ha portàda via...
Addio, musica grande,
de Verona un dì l’orgoglio!
T’ha sassinà paroni
’tenti solo al portafoglio.
Par sent’ani i veronesi
i t’ha amàdo dai scalini...
le fameje dei pitochi
ghe portàva ’nca i butìni
con in man i mocoleti,
che illuminava de magìa
quele sere, quel incanto
fato d’arte e de poesia...
E rivava su par aria
a curiosàr ’nca le stele,
incantàde dal prodigio
de le musiche più bele...
Nessun pensava ancora
a scondar ’l firmamento,
o a sassinàr l’Arena
par rifàrla de cemento!...
Ma po’ ha scominsiàdo, i barbari,
a umiliar i musicisti,
a sassinàr la qualità,
a dissanguàr i artisti...
A parole i le esaltava,
ma le bale i era tante...
I disea: “Femo un Museo!”
... po’ i g’ha fato un ristorante.
Adesso lori i gongola
ché l’è for dai zebedèi...
i è ben altri i baraconi
che ghe fa ciuciàr più schèi!
E finché la lirica la more,
radunàdi tutti i suoi,
sprezzante dise ’l Sindaco:
“Ben, la organizziamo noi!”
... lori che i è solo boni
tutt’alpiù de organizàr
la festa dei udori
o la sagra del puinàr.
La lirica l’è morta...
ma, fin che ormai la more,
lori è solo preoccupàdi
se qualche volta piove...
Ma no l’è mìa la piova
che adesso l’ha bagnà:
gh’è solo un mar de lagreme
che inonda la città!