BAM! quante bale!

Mobilitàdo i s’avea in tanti:
comitati e cittadini,
e fameje che lavora,
done, veci, anca butìni
pa’ evitar che un mostro immane,
come un boia giustissier,
rivasse co la so mannaia
a sassinàr tuto un quartier!
Na spietata orda de barbari
lì, par l’area dìta “ex Bam”,
l’ha partorìdo sensa scrupoli
un progetto disuman:
i ha deciso de piantàrghe
quatro torri gigantesche!,
co apartamenti e con botteghe,
e ascensor, saracinesche,
e po’ gran supermercati,
cambi de circolassion,
automobili attiràde
par far ancor più confusion,
e pa’ intasàr sensa ritegno
un quartier za stofegà...
e ogni ciuffetìn de verde
pian pianin el morirà...
Gnente verde, gnente aria,
gnente spassi pa’ i butìni...
sol cemento, gas, benzine
(sensa tanti clandestini)!...
E pa ’l futuro del quartier
ormai ciàra è la so sorte:
de na vita chieta e sana
la sarìa sèrto la morte!
Ma el Comune de sti giorni
l’ha copàdo ogni speransa!:
“El progetto ormai ’l va avanti:
L’ha volù la maggioransa!
No se pol più rinunciàr!
No se pol far marcia indrìo!
A pagàr quela penale
el Comune l’è restìo!”
No, ma... come no se pol?!
Qua gh’è un ris-cio za imminente!
Questa za l’è un’emergensa
par la vita de la gente!
E cì è stà che avea accettàdo
sto progetto demensiale?
El Comune el fassa i nomi!
Che i paga lori la penale!
Fato sta che adesso el “Bam”
za l’è intanto diventàdo
quasi el simbolo, la sigla
de tante bale ch’i ha contàdo:
“Quello che più c’interessa
è la salute della gente!”
Bam! “Mèta del nostro lavoro
è la tutela dell’ambiente!”
Bam! “Il futuro dei bambini!,
questa è ancò la nostra mira!”
Bam! “Sol questo ci sta a cuore:
che la gente la respira!”
Bam! Bam! Bam!... Fra tante bale,
na roba sol i ha fatto za:
i ha za condannàdo a morte
un bel toco de città!