La collina sassinà

Profitàndo de na legge
sbalinàda e demensiale,
tanti ha fatto su in collina
na catastrofe epocale!
I n’ha devastà el paesaggio
in un modo sconto e losco:
impenì i l’ha de cemento,
i ha tajà tochi de bosco!
La permetteva, quela lege,
de costruìr “rustici annessi”:
du tettoie, tri steccati,
un capanno par i cessi...
Ma tanti alora, imboressàdi,
come barbari scaenà
tutta quanta la collina
pian pianin i ha sassinà!
E, se anca no i saveva
cosa fusse na galina,
par “destinassione agraria”
i g’ha costruìdo insìma:
i ha tiràdo su gran muri,
i ha inventàdo sottotetti,
e terasse e porticati,
e saloni e gabinetti,
e cantine de gran moda
co i so bei matoni a vista,
e soggiorni luminosi
sotto altane che conquista!
Le tettoie che doveva
cuèrzar solo du trattori
le s’ha trasformàde adesso
in palassi da gran siori.
In do’ i dovea solo slevàr
tri pulzìni con so mama,
i fa feste strabilianti
fra vetrate e panorama!
E, nel casoto che serviva
par atressi e par rimorchi,
grandi sene co la scusa:
da magnàr ghe n’è pài porchi!
El Comune che, impudente,
fra promesse sora e soto,
po’ no l’ha mai fato gnente
par fermàr sto teremoto
(e i è i stessi che po adesso,
con ridicolo carisma,
i se vanta d’essar bravi
a catàr fondi contro el sisma)
par no scontentàr nessuno
de cì sta lassù con boria,
g’ha za pronta la variante!,
el condon, la sanatoria!
... E po’ i tornarà felici
a contàr chieti a la gente
quanto gh’è da preoccuparse
pa ’l degrado de l’ambiente!