L’amministrazione del fare (la spesa...)

Là in do’ che doveva nàssar
un gran Polo Culturale,
ghe sarà ’nvesse un colosso
de l’industria alimentare!...
Al Museo nomàdo “Amo”
(n’antra bala come tante...),
dopo tanti bei proclami,
i g’ha fato un ristorante!,
a conferma che al Comune,
dopo tanto predicàr,
questo è quel che più interessa:
la cultura... del magnàr!
E i ne anuncia adesso ancora
altri piani demensiali:
come barbari è in arrivo
novi centri commerciali!
Solo ne la stessa via
che da Sud porta in cità,
ben schissàdi l’uno a l’altro
in tantissimi i sarà!:
ghe sarà l’Esse bislonga,
“Vi Erre Mall” con i todeschi,
e l’Ikea, e l’Eata... ly
l’ex Cartiere... stemo freschi.
Sarà questo el benvenuto
alla città ch’è “dell’amore”,
par mostràr che po’, in realtà,
la cultura! qua... la more!
Intanto fieri i caporioni
sempre ancor se definisse
“l’Amministrassion del fare”
... ma ’sa fare, no se sa...
Fare forse quele robe
za promesse mile volte,
che impenì n’ha de speranse
prima date, dopo tolte?
Fare forse la tramvia?
L’Arsenal za manomesso?
El traforo con gran pompa
mile volte za promesso?
Far l’Emporio pa’ i pitochi?
Un Teatro comunale?
Un Museo a Castelsampiero
co la so funicolare?
Fare un filobus che riva?
D’esse-o-es la centralina?
De le strade sensa buse?
Sensa sfregi na collina?
Dèsso forse finalmente
i veronesi, rassegnati,
i ha capìdo ’sa vol dir!,
grassie a sti supermercati:
cosa mai che ’l sia sto “fare”
se pol dirlo sensa offesa:
’sto “del fare” che i ne vanta
vol dir sol: “fare”... la spesa.