Il piano

L’era stàdo lu a affidàrghe
la difficile missione:
“Va ti, Gira, a l’Ente Lirico!
Pensa ti a l’affondassione!”
E quel perito agrario
sconto da la cavejàra
più d’una roja l’avea fato
che sguàza ne la molonàra.
E quan’ dopo era rivàdo
el momento de cambiarlo...
“Se dèsso serve un sostituto,
decido mi, che no strapàrlo:
qua ghe vol un vero esperto!”
l’avea, serio, sentensiàdo...
“Un uom che sia d’alto profilo!”
l’avea tosto anca zontàdo
...con la stessa sicumèra
de quando un dì l’avea promesso
fin el fìlobus, e ’l traforo
al cittadino un fià perplesso...
Fatto sta che dopo un poco,
scrioltolando qualche bega,
l’ha po’ riciamàdo el “Gira”,
e ’l g’ha ridàto la carega!
E l’affondassione l’è ’ndà avanti,
co la straje dei artisti,
coi burroni nel bilancio,
col dolor dei musicisti!
Adesso el Sindaco el minaccia:
“O stè boni, o azzero tutto!”
Fao morir la Fondassione!
Vedarì allor che bel lutto!”
Ma... la Stagione Lirica?
“Qua in Comune! la faremo!...
ché tri quattro sonadori
da qualche parte i cataremo!”
... Sarìa la morte più sicura
par la lirica in città...
na tragedia smisurata,
una gran calamità!...
Ma i g’ha un piano, za l’è ciàro,
par scampar da sta bufera...
i ha imparà sto insegnamento
da la cronaca più nera:
’nca ’l più teribole sassìno
no pol essar condannato
quando po’ più no se trova
gnanca el corpo del reato!
E, vedendo che ’l pol essar
questo un piano de successo,
co la so vittima, la lirica,
i ha pensà de far l’istesso:
i l’ha affondàda, seppelìda,
fin in fondo sprofondà...
dèsso i le fa sparìr del tuto
... e lori i resta in libertà!