Le nomine nei Enti

Dèsso el Sindaco el procede
a le nomine nei Enti...
e se sente, i cittadini,
un pocheto deficienti,
stupefatti nel vardàr
qual el sia ’n realtà ’l criterio
par mandar nel posto giuto
quel più competente o serio...
parché è ciàro che no ’l serca
qualo ’l sia ’l mejo che gh’è:
che i sia amissi! sol ghe importa,
mejo ancor se lecapiè!
... Un criterio za dopràdo
par far qua Sovrintendente
un che proprio de la lirica
no l’ha mai capìdo gnente.
E l’amìgo che par anni
gh’era stàdo più a contatto
(tanto ch’i era diventàdi
in realtà “coppia di fatto”)
e i avea promesso insieme
roboanti solussioni,
par na bega elettorale
el l’ha ciapàdo a pessatoni:
el g’ha cavàdo la carega
solo da matina a sera...
l’ex amìgo a l’improvviso
l’è finì col cul par tera!
Al so posto, un novo amìgo
più fedele e più obediente,
che i progetti za aprovàdi
dèsso el dise: “No i val gnente!”
che ’l vol far tutto de novo,
e po’ el dise incocalìo:
“No, non è una retromarcia!”,
... e po ’l fa la marcia indrìo!
’Soma indove che i leghisti
i arraffava a piene mani,
dèsso via el le cava tutti
e ’l ghe mette i so... tosiani!
E parfìn un posto el cata
par quel caro vecchio amìgo
che a lo Spòr l’era Assessore
sensa mai far gnanca un figo...
parché un qualche incaricheto
’l ghe l’avea tegnù nel calto
par cì avea, fra tanti spòr,
praticàdo solo il salto!:
da sinistra fin a destra,
e po’ dopo un po’ più in là...
basta sol su na carega
po’ riussìr a star sentà!
...Parché qua la qualità
de la qual se pol far sensa,
de sicuro l’è una sola...
la se ciama: competensa.