No gh'è verso... di Roberto Puliero
stampa

“Filobus, si parte!”

Parole, pensieri, a ruota libera dell'istrione Roberto Puliero

Parole chiave: No gh'è verso (170), Roberto Puliero (190), Satira (145)

Bela in grande, a tuta pagina,
i l’ha sbaràda sul giornàl
come se la fusse proprio
na notissia eccessionàl...
con un titolo eclatante
messo lì a regola d’arte
pa’ anunciàr sta “novità”:
“Ecco il filobus: si parte!”
Fra i lettori ha ris-cià in tanti
alor de farse anca del mal,
rugolandose dal ridar
gnanca fusse Carneval...
A tanti altri invesse intanto
gh’è spontà na lagrimeta,
ricordando vecie fole
che ghe contava la noneta...
... ché in efeti sta “notissia”
i l’avea dà za mile volte!
sempre istesse le parole,
insieme a mille giravolte
mescolàde con promesse
proclamà con gran calore
fin rivàndo un dì a ’nunciar:
“Manca ormai solo il colore!”
E, siccome i n’avea dito
“l’andarà a eletricità”,
dèsso tutti qua a Verona
vol saver come l’è stà:...
come mai fra gran proclami
po’ no l’era mai partìo?
E nasse mile spiegassioni
fra el saon e l’insemenìo...
Questo el pensa che serviva
forse na spina gigantesca
con un filo longo longo
de fabbricassion tedesca...
ma sto fil, forse costretto
a giràr tutti i momenti,
el se ingropàva dapartuto
fra le ciese e i monumenti!
St’altro, appena l’ha savùdo
che come un dì par la tramvia
le tiràche i l’avrìa messe
sol ne la periferia,
dise: in centro el cittadino,
spaentà da promesse vaghe,
avrà pensà: sensa tiràche,
po’ me casca zo le braghe!
E se intòrcola dovunque
le più strambe spiegassioni
fra la gente za intortàda
da promesse e titoloni,
che ben sa che, co’ i proclami
se rivela po’ un disastro,
de za pronte gh’è in realtà
sol le fòrbese col nastro!
E lezendo n’antra volta
sta “notissia” strabiliante,
se sa ben che, quela vera,
l’è una sola, fra le tante:
quante bale za sul filobus
n’è tocàdo de sentìr...
de sicuro: l’è in ritardo
prima ancora de partìr!

Tutti i diritti riservati
“Filobus, si parte!”
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.

Non sei abilitato all'invio del commento.

Effettua il Login per poter inviare un commento