El provincialismo

... Vol dir: ignoràr
la nostra vera belessa,
smaniàr d’essar più grandi,
aver manìe de grandessa,
dismentegàr i tesori
che g’avemo anca qua
par sognàr la nomea
de na grande cità...
snobàr quel che succede
qua in campo locale,
e smaniàr d’essar sempre
in quel nassionale!
Campioni de questo
i è i nostri giornài:
l’è na roba sol valente
se ghe n’ha parlà la Rai!
Se gh’è artisti veronesi
che fa diffusion del bello,
l’è par lori più importante
quel che va ’l “Grande fratello”!
E ogni tanto, pa esaltàr
sto provincialismo qua,
i sbàra de le gran sempiàde
da ste smanie generà!
Sul balcone de Giulieta
un dì i scrive a tuto tondo
che par sèrto l’è sto sito
“il più visitato al mondo”!
(come se Parigi o Londra,
o le metropoli del bello,
le smaniasse par l’invidia
de un gran falso in via Cappello)
Sui mercatini de Nadàl
i ne inculca nei servèi
che par sèrto i è a Verona
quei più grandi, quei più bei!
(in realtà i gh’è dapartuto...
noantri i emo sol copià,
ma vantemo co impudensa
che qua gh’è i più visità)
Pa esaltàr “Veroninlàv”
i se insusta con clamore
e i ne conta che “Verona
capitale è dell’Amore!”
(desmentegàndo che g’avemo
le panchine co la sbara!,
e che par altri pori cani
gh’emo pronta la lupara)
Col Vinitaly po’ adesso,
con na boria eccessionale,
i sentensia: “Siam del vino
or la capital mondiale!”
E, siccome che, fra tanti,
vien Salvini con Di Maio,
e el Governo finalmente
catarà quel del formàjo,
i sbàra in prima pagina
(gnanca i fusse el Padreterno):
“È per certo qua a Verona
che si formerà il governo!”
... come fusse da vantàrse
dir: “Verona crocevìa!...”
sol parché du caporioni
s’ha catàdo a l’osteria...