Na sbrancà de ipocrisia

L’Assessora a la cultura
e ’l so servo tontolon,
che no ’l sa ’sa sia cultura
e ’l fa rima con sucon,
i avea un giorno za deciso
(i era i so primi tempi belli),
par far vedar ci comanda,
de farghe le scarpe a Savorelli!
L’era questo da anni e anni,
con compentenza eccessionale,
el responsabile e l’artefice
de la nostra Istà Teatrale.
L’era l’unico in comune
vero esperto de teatro...
ma se sa che ’l più ignorante
crede d’essar anca ’l più scaltro...
fatto sta, pa eliminarlo,
che un giorno con solennità
i ha butado fora un bando
... tutto quanto scombinà
E a cì ghe fasea presente:
“de becanoti l’è imbugà”,
ela candida disea:
“ma ’sa disìo? L’emo copià!”
Ma po’, no catando mìa nessun,
sensa pudor, in conclusion,
i è tornà da quel de prima
a pregàr: “salva la stagion!”
L’è tornado, e sensa un franco,
sensa ’na vera collaborassion,
l’ha combinado in du e du quattro
un decente cartellon!
Adesso, tempo de bilanci,
ela bela e sorridente
par la conferenza stampa
la se g’ha sentàda a rente!
E fin che lu el ne illustrava
un bilancio eccessional,
ela quel che lu el diseva
la ripetea come un papagal:
“l’innovazione... la cultura...
Una piece come un concerto...”
Ela ripeteva in ghigheri
Come fusse anca so merto!
E ’l direttor artistico?
Quel che dovea rivàr a genàr?
Nessun ghe ne parla più,
no i sa gnanca cosa far...
Ghe interessa de più intanto
farse ben fotografar
e “’l gran lavoro” del so ufficio
ogni giorno un fià esaltar
ma quel che resta a la cultura
no se sa adesso cosa el sia...
na roba sola l’è sicura:
na sbrancà de ipocrisia.