El novo simbolo

I ha deciso de cambiàr
dèsso el stemma de Verona,
in do’ da un toco gh’è na Scala
pitturàda un po’ a la bona...
L’è l’insegna dei Scaligeri,
che n’ha governà par ani...
come a dir che semo, sempre,
stàdi amministrà da cani...
E in Comune, con impegno,
de scoprìr i s’ha sforsà
cosa ancò mejo de tutto
simboleggia la città!
I ha esaminà quel che in sti ani
n’ha contà i nostri giornài,
i ha studiàdo tutti i titoli
sul traforo, sul tramvai,
su Arsenàl, funicolare,
e anca su la copertura,
e sul bus, su Veronetta,
sul decoro e la cultura...
I ha catàdo: “Sul traforo
slitta ancor la soluzione”...
“Slittan altri nove mesi
i lavori alla Stazione”...
“È slittato a chissà quando
il progetto di tramvìa”...
“Slitta il filobus! È tardi
per cercare un’altra via”...
“Il parcheggio Taldeitali
slitta ormai all’anno nuovo”...
“Per Giulietta è ’ncor slittato
quell’ingresso là dal Nuovo”...
“Slitta ancora ahimé il progetto
di far nuovo l’Arsenale:
è slittata la scadenza!”...
(nonostante tante bale)
“Per coprire un dì l’Arena
si son fatti gran discorsi....
Se non piove, ora il bel tempo
fa slittàr tutti i concorsi”...
“Slitta ancora, a Veronetta,
il progetto del decoro”...
“È slittato chissà dove
il progetto del traforo”...
Fatto sta che, letto questo,
i ha pensàdo e ripensà
qualo sia ‘l simbolo giusto,
e a la fine i l’ha catà!:
“Sì, l’è vèra: ancora adesso
semo governà da cani,
ma la Scala ormai l’è vecia,
l’è za lì da tanti ani!
Or bisogna rinnovarlo
come el marchio de na ditta!
Eco allora el stemma giusto:
no la Scala, ma... la Slitta!”.