Da in do’ viènli? Ci èi?

I riva qua disperàdi
sfidando la sorte,
par sercàr na speransa,
par scapàr da la morte...
L’è un esodo biblico,
un smissioto de genti...
come un pugno nel stomego
che ne lassa sgomenti,
co la paura de perdar
tute le sicuresse,
e dover magari spartir
le nostre richesse...
Bisognarà sia i Governi
a trovàr solussion...
ma gh’è intanto n’emergensa
fatta de disperassion.
Solo che la paura
del diverso e l’ignoto
la fa nàssar discorsi
sbrocà fora de boto...
e i è alibi in mascara
sventolàdi da quei,
preoccupàdi, che i sèita:
“Da in do’ viènli? Ci èi?”
“Ma che profughi e profughi!
I è soltanto dei driti!
Eccoli dèsso in albergo
mantegnù e riveriti!”
“Mi so’ un bon cristian!,
le me porte i è vèrte...
ma se i è delinquenti
che me ciàva le cuèrte?”
“Mi voi prima saver
da indove che i vien!...
no smissiàr delinquenti
con la gente par ben!”
“Èi sul serio dei pitochi
questi qua che vien da fora?
Ma pensemo invesse ai nostri
con la casa sottosora
parché i è disococcupà!...
Farìa comodo anca a lori
trentasinque euro al giorno
par sentirse un fià più siori!”
...zà scordà quele parole:
“... m’avì dato da magnàr
quando nudo e pien de fame
no savevo dove andàr...”
Eppur cì n’avea insegnàdo
tanto ben la carità,
’mezo a tanti insegnamenti,
mai l’avea dìto in realtà:
“Quando stè par iutàr uno
disperàdo e mezo morto,
no ocor mìa par sèrto, prima,
domandàrghe el passaporto!”.