A Giorgio Gioco

Pur nei ultimi so giorni
– za la candela un lumesìn –
el ghe insegnava a le infermiere
a condìr el semolìn...
E po’ l’è partìo sereno
col sorriso stampà in facia
e con l’anima lustràda
sensa gnanca un fil de macia.
L’ha par anni regalàdo
armonìa e serenità,
mescolando, a le pietanse,
el ben de l’ospitalità...
e zontando, su ogni piato,
un contorno de poesia,
na spolvaràda de Verona,
un cuciaron de bonomìa,
mescolando le parole
come un gran cogo sapiente,
come se ognuna la fusse
proprio un novo ingrediente!
E, più ancora de la tola,
ghe piasea... la tavolàda!,
in do’ la gente stesse insieme
ciacolàndo imboressàda...
e lu a contàrghe dei versi,
za mandàdi a memoria,
su Verona e la so luce,
i so ponti e la so storia!
Dèsso un toco de Verona
sensa ti l’è andàdo via...
N’è restà un buseto dentro...
No se sa cosa che ’l sia...
Ma, se n’è restàdo un buso,
na speransa alor ne speta:
che riessa un fià a impenìrlo
qualche vecia to riceta!
E se semo più “pitochi”,
vorà dir che Barbarani
scrivarà ’nca par noantri
i so versi più nostrani...
El g’ha ’l so dafàr, el Papa,
par far sì che ’l Paradiso
sia la meta ognor più ambita
par chi vive col sorriso...
El farà manco fadìga
or che Giorgio l’è rivà:
dèsso tuto el Paradiso
el profuma de pearà!