No gh’è più le ideologie

Manifesti de ogni tipo
rivarà par piasse e vie,
ma na roba l’è sicura:
è sparì le ideologìe!
E gh’è ormai solo un precetto
che ’l sia ancora rispettà:
che non sappia mai la destra
la sinistra cosa fa!
Gh’è da dir, par dirla tuta,
che però l’è ’nca un pecà:
prima almanco se saveva
quale idee n’avea cunà!
Za da adesso qua a Verona
sponta novi candidati...
ma chi i sia no l’è mìa ciàra
i avversari o i alleati:
Dèsso cì sta da na parte
basta solo qualche bega
parché ’l scapa da quel’altra
a salvàrse la carega!
Se discute, se tramàcia
dei partiti ne le stanse:
se sconfonde gran progetti,
se ingarbuja le alleanse...
Quei che avea votàdo Tosi
i se cata a barufàr
con quei stessi che con lori
se catàva par cantàr:
“Fora i neri! Via i teroni!”
La farina ghe va in crusca,
sia che i voja ’ndàr da soli,
sia che i vada col Berlusca...
E i se varda con sgomento
tanti veci comunisti...
Quando i scopre la realtà,
i deventa ognor più tristi:
dopo aver i so avversari
contestàdo a tutto spian,
i se incorze che ’l so capo
dèsso l’è un democristian!
’Ntanto Tosi, in ricompensa
a tuto quel... che no l’ha fato,
con coràjo e co impudensa
dèsso el vol: terso mandato!
(quando un terzo in verità,
a vardàr con attension,
gh’era za rivà al so Vice:
l’era de... comparission!)
Se qualcuno g’ha un tormento
che ghe ròsega el servèl,
qua a Verona tutti dise:
mi me sento un bissinèl!...
Ma, incurante de sto detto,
dèsso el Sindaco, bel bello,
l’ha za tosto minacciàdo
candidàr la Bissinello!
Da na parte e da quel’altra
gira i stessi paroloni,
che no parla de idee ciare,
ma sol de le so ambissioni...
E in mezo a tanta confusion
l’è impossibile capìr
de sto passo sta città
de che morte ha da morir!