No gh'è verso... di Roberto Puliero
stampa

La rissa

Parole, pensieri, a ruota libera dell'istrione Roberto Puliero

Parole chiave: No gh'è verso (170), Roberto Puliero (190), Satira (145)

Ecco el titolo scioccante:
“Una rissa fra immigrati
ai giardini proprio in centro
là davanti ai candidati!”
Fin che... i saggi i discuteva
sui destin de la cità,
i s’ha dato, i disperàdi,
cortelàde in Piassa Bra!
E da lì, par giorni e giorni,
è partìda la question:
“Non c’è più la sicuressa!
Ogni giorno un barufon,
una rissa, un furto, un sìppo,
n’agression, una rapina...
Gh’è balordi par le strade
che par gnente i te sassìna!
Gh’è bivacchi de scoàsse
ne le case sbandonàde,
nei giardini spelaciàdi,
ne le strade sluamaràde...”
E parfìn quei che faseva
i Assessori insieme a Tosi,
e che i ghe batea le mane,
sempre insieme come i sposi,
quando lu l’andava intrepido
con orgoglio e sicumèra
a vardarse tuti i sgomberi
che i fasea matina e sera,
e i diseva: “L’è stà brào!
Sicuressa! l’ha portà!”,
... dèsso che, par la poltrona,
i g’ha invesse barufà,
dise: “Che vergogna, el Sindaco
no ’l fa mìga proprio gnente!
E non c’è più sicuressa
par le strade, par la gente!”
Ma za el Sindaco risponde:
“Mìga vèra! Sì, la gh’è!
Verona l’è città sicura
tanto in auto quanto a piè!
tutalpiù, de insicuresse
solo gh’è la percession!...”
“Ma ’sa dìto? A Veronetta
i te assale col baston!”
“Un episodio... no vol dir!
Sicuressa? qua la gh’è!”
“Quala mai? Lo dise i fatti!
Sicuressa no ghe n’è!”
E i baruffa fra de lori
sensa dar na solussion...
e ne rivarà fra poco
alor n’antro titolon,
pronto solo da stampàr:
“Una rissa fra candidati
ogni giorno proprio in centro
là davanti... agli immigrati!”

Tutti i diritti riservati
La rissa
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.