El nome novo

El s’aveva fatto elegiar
promettendo “sicuressa!”:
“La città sensa balordi
sarà proprio una belessa!
Basta sengali! – el diseva –
Basta Rom che fa i pastroci!
Sparirà tutti i balenghi
da giardini e dagli incroci!”
El s’aveva ’nca inventàdo
le panchine co la sbara...
“Che no i vegna più a sentàrse
dal Burundi o da l’Asmara!”
El svejàva fin de note
camer-men e giornalisti,
che i le immortalasse intrepido
a dar la caccia ai poricristi...
E par far trionfàr la chiete
contro i bar più fracassoni
l’invocava ’nca l’esercito
con mitraglie e coi canoni.
È passàdo za dei ani...
ma ’l degrado, ben o mal,
el gh’è ’ncora a la Giarina,
Piassa Possa o Pradaval...
e de pitochi e de barboni
che par carità i tampìna,
ai giardini e anca ai incroci
ghe n’è ancora più de prima!
’Nsoma no i ha fato gnente!:
sol promesse spampanà!...
Ma eco i ’nuncia de sti giorni:
“C’è una grande novità!”
E, parché nissun se incorza
che l’è stàdo un fallimento,
i trà fora dal cilindro
un profondo cambiamento!:
e i proclama con gran pompa
no una vera solussion,
ma... che i g’ha cambiàdo nome
a l’idonea Commission!
“Commissione Sicuressa”
i ghe diseva fin a ieri...
ma da qua in avanti, invesse:
“Commissione dei Quartieri”!
Pensa ti che idea geniale!
Oh, che bella solussion!
Quel che i sa de sicuressa
l’è sta sola conclusion:
che pa’ intortàr i cittadini,
quando no i sa cosa o come,
no ocor mìa far ben le robe...
basta sol cambiàrghe nome!