La fabrica de le notissie

Ogni sabato el giornàl,
come fusse novità,
el ne annuncia che “domani
un gran caos sarà in cità!”
Ghe sarà sì tanti eventi,
programmàdi a più no posso,
che la festa de sicuro
“sarà da bollino rosso”!
Gh’è i concerti, la partìa,
le casete dei Sapori,
e comissi, e conferense,
e la sagra dei udori...
e politici da Roma
rivà qua da destra e manca
par promovar candidati
che po’ no i conosse gnanca...
e gran manifestassioni,
du tri scioperi e cortèi,
mercatini, antiquariato
... e la fuga dei servèi...
e le mostre, le adunanse,
e la casa de Giulieta,
Straverona e Strapaese
co le marce e la corseta...
e turisti in braghe curte
co la piova o con el sùto,
che fotografa i bancheti
dove i pol catàr de tuto:
mostre de la ciocolata,
dei arnesi da cusìna,
cavastropoli e pironi
da impenìrte la cantina,
mandorlato e bomboloni,
ùa co l’insalata rissa...
tutto el centro l’è na sagra
come gnanca a Vangadissa!
Po’ el dì dopo, lunedì,
el ne contarà el giornàl,
come fusse na sorpresa,
sta notissia originàl:
“È stata ieri per Verona
festa da bollino rosso!
Con migliaia di persone
tutt’ il mondo qua si è mosso!
Intasate ben le strade,
pieni bar e ristoranti,
grandi piazze e vie del centro
tutte piene de passanti...”
E ogni volta i ne le conta
come fusse novità...
quando invesse ste notissie
solo i è pre-fabbricà
a conferma che, le niove,
el giornàl, più che contàrle,
za da un toco el preferisse
de pensàr... a fabricarle.