La dèroga e l’emergensa

S’ha savùdo de sti giorni
che qua i bus de l’A TI VI
i sparpàja dapartuto
tifo, tanfo e TI BI CI:
con trent’àni de servissio
dentro tubi e scapamento,
i spùa, i sbòssega, i regàta
tutto un invelenamento!
Ma el Comune, che avea dito
“Supermulte a chi ci inquìna!
Fermeremo tutte l’auto
che qua l’aria ne sassìna!”,
za la deroga ha concesso,
pronto sempre a comodàr!
... e i catòrci scancanàdi
i continua a circolàr!
Ma i ne dise: “Noo, stè chieti!
Sèrto, i è da rottamàr...
Sì, l’è vèra: quando i sbuffa
no i te fa più respiràr...
Ma qua rivarà fra poco
superbus accessoriati,
con le tenniche avansàte,
tutti “verdi” e controllàti!
ma, butèi, par el momento
no se pol fàrghene sensa!
Po’ i fa solo tratti brevi,
o sol in casi d’emergensa!”
... come se emergensa vera
fusse farli circolàr,
e no invesse ne la chiete
far la gente respiràr!
Ma par quei che ne aministra,
co la testa in confusion,
l’è la deroga!, la regola!
e la norma... l’eccession!
.... come quando i avea dito:
“Se emergensa questa l’è,
femo el blocco de le auto!
Ferme tutte! Tutti a pié!”
e po’ de corsa i s’avea messo
a inventàr mile eccessioni,
sicché in tanti ancor podeva
stofegàr tutti i pedoni:
podea circolàr turisti,
preti, suore, commedianti,
osti, mascare, assessori,
e vecioti con badanti,
infermieri con suposte
e dottori co ambulanse,
piassaroti coi maroni,
contadini con narànse...
par poder po’ dir, infine:
“Visto che no serve a gnente?”
... e, co la cossiensa neta,
continuàr a no far gnente!