L’informassion d’istà

Quando regna un fredo bisso
o anca un caldo equatoriale,
la dovrìa, l’informassione,
essar sempre puntuale...
Ma, in sti giorni, pol succedar
grandi eventi tutti in serie,
e na roba l’è sicura:
che tanti giornalisti è in ferie!
E in tivù e giornai ’mperversa,
alor, notissie riciclàade!...
e vecie immagini d’archivio
za da anni pubblicàde!
E in tivù tutti i mezzobusti
i è in vacansa, poricani,
e sol repliche i ne manda,
e telefilm americani!...
Sa ghe importa dei vecioti
con i pié dentro al cadìn?
Se no i pol andar al mar,
che i se varda Rin Tin Tin!
Ghe sarìa, a Verona, un saco
de spettacoli che vale...
ma l’è morta za da un toco
qua la critica teatrale!...
e i ghe manda, dal giornàl,
el butèl più incompetente,
che ’l copia mal da un depliàn
sensa gnan’ capìrghe gnente...
finché, sepolto da veline,
el butèl de redassion
el esalta co entusiasmo
sol la sagra de Raldon...
E foto e immagini tivù,
ritrasmesse e ripescà,
te t’incorzi che i è stesse
zà postà ’nca l’an passà:
gh’è vecioti in canottiera
con in testa el fassoleto
che come tanti beduini
i se taca al rubineto,
e turisti co la pansa
imbombegàdi de sudor,
e butèle sderenàde
descolà sensa pudor...
E i ghe zonta ’nca i consigli
de quel genio de... l’esperto!,
che ’l ne spiega: con el caldo
mejo star sentàdi al cuerto!
Ogni tanto po’ i ghe buta,
scritta in pressia e con premura,
qualche notissiola vecia
che par sèrto l’è sicura:
c’è degrado a Veronetta,
un progetto a l’Arsenàl,
il percorso per il fìlobus,
bruta gente in Pradavàl...
E ogni giorno i ne riconta:
“Za il Verona l’è partì”...
e i annuncia grandi “colpi”
... in realtà da serie Bi!
Parché infin le informassioni
le sia almanco un fià più serie,
bisòn ’soma sol spetàr
... che le torna da le ferie!