I sponsor giusti

No gh’era tante scritte
su le maje de na volta...
i colori... i era quei!,
sempre i nostri, ogniqualvolta!
I era el simbolo dei sogni,
gh’era el giallo e gh’era el blù...
dèsso i pol vestirse in nero,
o anca in verde butà su.
Po’ è rivà nel calcio i sponsor...
dèsso è lori a far da papa!,
e i le scrive in petto, in pansa,
e parfìn de meza ciàpa.
El Verona, a ben vardàr
risultati e conclusion,
l’ha catà sempre quel giusto
par segnàr ogni stagion.
Avea scominsià la CANON...
e na squadra de campion
l’è rivà fin al scudetto!...
L’era alor proprio... un canòn!
E gh’è stà, dopo, la RICOH,
nome adatto ai Paperoni...
e ’l Verona ’nca in Europa
el zugava coi squadroni.
Po’ gh’è stà la decadensa
a rugolon zo pa’i scalini,
con la scritta giusta: RANA,
par un team... de tortelini!
E quando po’ è rivà MARSILLI,
quel gran “pool” de tortelini
pian pianin l’è deventàdo
un squadron... de codeghini!
E po’ è rivàdo Pastorello,
con gran vanto e con orgoglio!
Ma proprio come ’l novo sponsor
’l g’avea NET nel portafoglio!
Semo andàdi fin in Cì!...
El tifoso no ’l capiva...
e par quelo su la maja
solo GIALLO! compariva...
e, più sotto, ZONE D’OMBRA,
... come i campi de la Cì,
sensa gioia, sensa gloria,
col magon de zugàr lì!
Ma pian pianìn semo tornàdi
a zugàr in serie A...
Se disea: co l’AGI ESSEMME
dai, la luce l’è tornà!
Ma eco ahimé che, sul più belo,
varda ’sa è successo st’ano:
su le maje verde vomito
dèsso i g’ha scritto METANO!
E n’è rivà da sta pensata
– se pol dirlo a cico spana –
n’antra olta el nome giusto,
ché... del gas semo a la cana!