El problema l’è che ’l parla

L’inaspettata riconquista,
infin, de la serie A
veci ossequi e servilismi
d’improvviso ha risvejà!
Quan’ pareva ormai ’mpossibile
conquistàr la promossion,
al Presidente del Verona
tutti ghe disea: bufon!
I le scrivea su tuti i muri,
su adesivi e carteloni,
su vetrate e manifesti
incolà in tuti i cantoni...
Ma dovendo dèsso celebrar
sta conquista sorprendente,
grandi complimenti e osanna
gh’è tocà ’nca al Presidente!
E i giornalisti, abituàdi
a far spesso i lecapié,
i ha riscominsià de colpo
a farghe ossequi da lacché:
in paginoni anca adoranti
addirittura i l’ha esaltà
come l’unico che tri volte
n’ha portàdo in serie A!
(desmentegando che, pensando
solo a mettar via la pila,
za el n’avea portàdo in B
par du anni ben de fila!)
E, par spiegàr qual l’è ’l motivo
che i ghe dise tutti “gnoco”,
i sentensia che l’è solo
parché ’l parla massa poco!
In realtà, ben rilezendo
i so discorsi novi e veci...
“Lo so bene che il Verona
fu fondato qua dai Greci!”
“Quando io sono arrivato,
qui a malpena c’era un campo!”
“Neppur per comprare il Mantova
ho mai speso così tanto!”
“Siamo i soli in tutto il mondo
con annesso Ristorante!”
“È stato certo Rafa Markez
il mio acquisto più importante!”
“Siamo gli unici a viaggiare
con un bus accessoriato!
L’ho anche in conferenza stampa
con orgoglio presentato!”
“Non possiamo certamente
far qui conti senza l’osto!
La squadra pol anca morìr,
ma però coi conti a posto!”
“Grosso e Pecchia con amore
li dobbiamo ringraziare:
ci han portato qua a Verona
il gioco più spettacolare!”
Rilezendo insoma tante frasi
ognor sbarà sensa patema,
se capisse ben infine
qualo sia in realtà ’l problema:
no l’è che n’intervista seria
no ’l decida mai de farla...
no l’è mìa che insoma el tase,
el problema l’è... che ’l parla!