El lampion blù

Piassa Bra l’è diventàda
na gran sagra sul Liston:
tutti i giorni l’è intasàda
da ogni manifestassion!
Gh’è comissi, esibissioni,
e palchetti, altoparlanti,
e taolini par le firme,
e striscioni rindondanti...
Anca dèsso a Santa Lussia,
dove gh’era un dì i bancheti
con zugàtoli e crocanti
messi lì pa i buteleti,
i ghe espone grandi struse,
taja brocooli e patate,
con mudande, canotiere,
con pigiami e con savàte!...
E na mattina i veronesi,
che zà no ghe ne pol più,
i vede in Piassa un lampion novo
tutto pitturà de blù!
Piantà in mezo ai so fradèi,
alti, austeri e assai ’leganti,
el ghe dà un pugno ne l’ocio
a chi passa, a tuti quanti!
Che ’l sia stàdo fòrsi un Ufo?
Ma che vandalo èlo stàdo?
Chi èlo sta quel deficiente
che de blù l’ha pitturàdo?
Solo quattro giorni dopo
i ne spiega come mai...:
“Lo savìo sa l’è sto obrobrio?
L’è un supporto par l’hai fai!
ché saremo... na Smart City!
qua a Verona... chieti, gente!
No savì cosa vol dir?
Na città più intelligente!
Tutti quanti con l’hotspot!
Tuti bei sintonizzàti!
Col friwai in tempo reale
ben connessi e collegati!
Co la rete più potente
se poarà anca pian pianin
proprio qua tacà al lampion
caricàr ’l telefonìn!
Se poarà saver notissie,
e del bus orari e spese!,
e mandarlo, se in ritardo,
in diretta a quel paese!”
Sì, va ben la modernèscion,
e l’hai fài, la connession,
e l’hot stop, la piattaforma,
e la web navigassion,
tutto quel che dèsso i inventa
tennologico e de più...
ma se impone na domanda!:
... ma parché proprio de blù?!
Parché rovinàr el stile,
la belessa, l’armonia,
l’elegansa raffinata
stile liberty manìa?
I ne dise che i farà
na città più inteligente...
L’è al momento, par cultura,
na città più deficiente!