El bando de la banda

Gh’è un Ufficio là in Comune
che dovrìa, par so natura,
(i g’ha dato el nome aposta)
occuparse de Cultura...
A dirìgiarlo i g’ha messo
un dirigente sapienton
con un nome - varda el caso -
che fa rima con sucon...
Ma a comandàr l’ambaradan
più de lu, un poco più sora,
se volemo dirla tuta
ghe sarìa ’nca n’Assessora
che però po’ , de cultura
no capèndoghe de più,
la ghe lassa tante volte
far sol quelo che vol lu!
I s’ha messo adesso in testa
de sercàr un Direttor
che ’l procura qua al teatro
tutto quelo che ghe ocor...
Uno competente e ’sperto
in realtà ’l ghe sarìa za...
ma no i vol mìa domandarghe
proprio a lu come se fa!
Ghe sarìa par la Cultura
anca, là, na Commission...
ma l’Assessora, ingelosìda,
la le varda de traerson...
e, invesse de collaborar,
i fa come i buteleti:
i baruffa, i se minciona,
i se fa schersi e dispeti!
Fatto sta che un giorno ela,
sensa dir come né quando,
la g’ha ditto al so sucon
de inventarse in pressia un Bando.
I l’ha butà fora el quìndese
fra ripicche e scondiroti,
con scadensa za al trentuno!,
...e infarcì de becanoti!
E i l’ha messo proprio in mezo
al periodo de le feste
parché no se ne incorzesse
le parsone più moleste...
A cì par questo brontolava
l’Assessora sorridente
g’ha risposto con el muso
de rabià, candidamente:
“Ogni attacco al nostro Bando
è in realtà premeditato!,
tant’è ver che quello scritto
noi l’abbiam solo copiato!”
(a scola se se vergognava
par aver copiàdo el tema...
ela invesse la se vanta
col beltà, sensa patema)
Chissà come finirà
la storia de sto Direttor...
ma la morale de la storia
za la lassa un gran dolor:
“Ma ci governa la Cultura?!”
questa qua l’è la domanda!
La risposta te la cati
lì, nel Bando... de la banda!