L’annuncìte

L’ha trovàdo un novo nome
quela vecia malatìa
che da anni ciàpa i Sindaci,
de qualunque parte i sia...
“Annuncìte” la se ciama!
La riva fin da la matina,
come un dì vegnea i recioni,
el morbìl, la scarlatina...
che, ricordo, po’ in fameja
(e però che tempi bei...),
quando un l’avea passàda,
la passàimo tra i fradèi!
Questa... i Sindaci la ciàpa!
Ma i so effetti devastanti,
sensa po’ che se incorzemo,
pol rivàrne a tuti quanti!
Ghe l’aveva za Zanotto...
adesso qua sta malandrina,
dopo Tosi e la Sironi,
l’ha ciapàdo anca Sboarina!
L’è... l’impulso travolgente,
l’è la smania de annunciàr
tante robe come fatte
quando i è ’ncora da far!
Quando che la ciàpa ’l Sindaco,
lu de paca, sui do pié,
svelto ’l convoca la stampa,
i serventi, i lecapié...
E premurosi i giornalisti,
a l’ossequio abituàdi,
con i so taccuìni in man
i core pronti e preocupàdi
par assistar con premura
i malati de “annuncìte”
come fa infermiere e suore
pa’ i malà de apendicìte.
E lu el taca za a ’nunciàr
“Il nuovo Stadio nasce qua”
No è mìa vèra, però intanto
i tifosi l’ha intortà...
“Abbiam tutto già deciso:
ora splende l’Arsenale!”
No è mìa vèra, però intanto
l’è una sola, fra le bale!
“Ecco qua, per la Giulietta
pronta è già la soluzion!”
No è mìa vèra, però intanto
i g’ha fato un paginon!
E l’è insoma, sta “annuncìte”,
na busiàra malatìa,
diffarente da le altre,
la più stramba che ghe sia!,
ché la ciàpa solo ’l Sindaco,
ma a la fin l’è la città,
par via forse del contagio,
... a catàrse buzarà!