I atentati

Tanti fatti de sti tempi
han purtroppo dimostrato
che dovunque, ogni momento,
pol rivàr qualche attentato!
Basta sol che nel tal posto
riva un qualche deficiente...
se ghe va ’l servèl in papa
no podemo farghe gnente!
E anca se po’ al Festivàl
gh’è cì canta alegramente:
“voi, con tutti sti atentati,
non ci avete fatto gnente”,
la paura, soto sotto,
quasi inavvertitamente,
s’ha infilàda dapartuto,
l’è sbrissià in mezo a la gente!
E piantemo su barriere,
dapartuto alsemo i muri,
fin l’esercito schieremo
par sentirse più sicuri!
Se lo vede ’nca a Verona
a l’ingresso de la Bra:
camionette de soldàdi
con el mitra ben spianà!...
E dove prima dominava
la vision, là, de l’Arena,
salta ai oci le barriere,
pitturàde da far pena...
E in più proprio de sti giorni
a Stagione scominsiàta,
i ne annuncia che l’Arena
“sarà sempre più blindata”!
Ghe sarà “metàl detettor”,
polisiotti che te palpa,
cani esperti che te snàsa
par scoprìr se gh’è na talpa...
Sarà giusto, mi no digo,
visti i tanti precedenti,
de stàr co le recie drite,
de stàr sempre su l’atenti...
però, insoma, tanti muri
i te lassa l’impression
de agitarse sol par gnente...
e na patetica illusion:
mostra sol, sti sbaramenti,
messi in furia lì così,
l’illusion che i terroristi
i passarà proprio da lì!
E par zonta, a dirla tuta,
i è gran brute ste barriere,
con quei oci disperàdi!
Sarìa mejo du fioriere!...
Così invesse, par combàtar
de attentati la paura,
ghe ne femo intanto un pochi
contro l’arte e la cultura!