El mondo el s’ha roersà

Fin da quando che i proclama
e, come un fato orginal,
i ne annuncia con gran pompa
ch’è finìdo el Carneval,
riscominsia cari e mascare
a sfilare dapartuto,
fin che la Quaresma trista
i le fa sparir del tuto.
Quando tanti gran progetti
i ritarda da ani e ani,
pronti i amministratori,
da perfetti ciarlatani,
eco che i ne dise forte,
indignà e scandalizà:
“Tutta colpa de le ditte
che no g’ha puntualità!”
I proclama che l’Arena
de la lirica l’è ’l tempio,
e po’ subito i annuncia
un progeto tuto sempio:
fàrghe sora na tetoia,
che no là sia più a l’aperto,
parché i g’abia tuti quanti
le fassine tute al cuerto.
Da quel giorno che i ha dito:
“Basta sagre in Piazza Bra!”,
a ogni festa una de nove
i n’ha tosto organizà:
le salsicce co i sapori,
l’insalata quela rissa,
mandorlati e salamèle
gnanca fusse Vangadissa!
Dopo aver za predicàdo
che ghe vol tuti i conforti
par chi serca ne la chiete
el rispeto par i morti,
i s’ha subito butàdo
su un progetto demensiale,
e i vol tuti impilonarli
l’un su l’altro in verticale!
“A garantir la sicuressa
– za par ani i n’ha contà –
qua ghe vol più polissìa,
che in divisa i gira armà!”
Fato sta che l’altro giorno,
pa inseguir un delinquente,
na patuglia ch’era in guardia
la s’ha mosso prontamente:
l’è partì a l’inseguimento
co attension, velocità,
... però un vigile el l’ha vista
e de paca... el l’ha multà!
E restemo a domandarse
sa succede in sta città...
forse no se n’emo incorti,
però el mondo el s’ha roersà!