Na sera in Arena

Son stà in Arena na sera de queste…
la nostra storia cantava dei cori…
limpido el ciel, na luna e tri stele
là su par aria cantava anca lori.
La magìa de quel ciel, de la musica el canto...
palpiti e incanti i s’ha mescolà:
pareva de essar, su le vecie piere,
dentro el prodigio de un mondo incantà.
Co l’animo in pace, vardando lassù,
a l’improvviso m’è vegnù da pensàr
che chi a l’Arena vol mètarghe ’l cuerto
l’è in pressia par sèrto da ricoverar.
Son stàdo na sera al Teatro Romano...
caldi e duri, i scalini, come na piera...
col cusileto za in pressia de bojo
a vardàr, sora’ l palco, na scatola nera.
... Pensàr che da là te vedevi na volta
i campanili e le tore de la nostra cità
che fasea da cornìsa ai artisti, a la scena
che come na perla la parea incastonà...
e te sentivi come un dolce sussurro
da l’Adese svelto che Verona se cuna,
fin che, par far ’ncor più belo el momento,
là su par aria appariva la luna!
Tutti sti cuerti balenghi i progeta
parché la piova no fassa spavento...
ma alor tanto varìa bombardarla, l’Arena!,
e po’ fàrghene n’antra tuta quanta in cemento!
ché tanto sti geni ancor no se incorze
che mai nessuna qua, mai, copertura
poarà cuèrzar tutto el buso de l’udo
che i g’ha de valori, de storia e cultura.
E, visto che adesso è iminente ’l momento
(ormai za da anni deventà tradission)
de quando: “Bisogna qua cuèrzar l’Arena!”
ne dise in gran pompa qualche genio saon,
fermemolo subito prima ’ncora che ’l parla!,
che solo el sussurra n’idea tanto balsana!
Bisogna blocarlo, far sì che no ’l parla,
e po’ con gentilessa... portarlo a Marsana!