La difarensa

Quando in na qualunque Assienda
un dirigente fa pastroci,
e no ’l ghe n’indovina una
pur de tutti soto i oci,
e con discorsi e gran proclami
el sèita a buzaràr la gente,
che, par forsa sottomessa,
no la pol mia farghe gnente,
quei che pol, sol dopo un poco,
i ghe dà un bel pessaton,
via i ghe cava la carega
e i le manda za in pension!
No l’è mia così in Comune,
in do’ no i fa i conti con l’osto,
e quei che desfa, briga, imbròja
resta sempre là al so posto!
Gh’è cì è stàdo incaricàdo
de fermàr l’inquinamento,
e da mesi no ’l fa gnente
sensa un fià de pentimento!
Ansi, el vanta de saver
quala l’è la solussion,
disendo a quei che no respira:
v’emo dà... un’educassion!
N’Assessora a la Cultura
firma un bando scombinà
e col sorriso la confessa
che la l’ha tutto copià!
E quel so illustre Dirigente
che fa rima con “sucon”
el le scrive addiritura!,
con l’orgoglio del saon,
d’aver lu un bel dì scoperto
che ogni ano, ben o mal,
tutti se pol star sicuri
che a dicembre vien Nadàl!
E gh’è gente che da anni,
sensa un poco de pudor,
ne promette e ripromette:
l’Arsenàl el sarà un fior!
E gh’è cì, par far più schèi,
el sassina alegramente,
quando riva uno che paga,
ogni accordo precedente!
E gh’è un Sindaco, immagàdo
forse sol de la Giulieta,
che assicura: “Celentano
valorizza Veronetta!”.
E ’l so menager più amato
inventa: “El l’ha volùdo lu!,
de vegner qua, parché sta Via
ghe ricorda la Via Glù!”...
... Adesso ch’è aumentà la polvar
e che l’aria è più malàda,
e, sensa gnanca educassion,
la città l’è invelenàda...
adesso che anca Celentano
n’ha lassà in braghe de tela,
scomparendo dal quartier
con un fiasco in più in scarsèla,
... tuti resta, là in Comune,
al so posto ben piantà!...
Sensa onor, sensa na scusa,
con carega incorporà!...