Par superàr la crisi
e par vendar più giornài,
no i serca mìga con costansa
de deventàr più brài,
d’essar corretti, seri,
far approfondimenti,
sensa essar sempre servi
de Assessori e de potenti...
ma i s’ha inventà el zugheto
del beniamino da votàr!
Se pol farlo coi tagliandi!
El giornàl basta compràr!
I meccanismi del zugheto
a la fin i è sempre i stessi...
E, dopo Miss e zugadori,
l’è la volta dei commessi!
Bisognarìa ’nsoma votàr
el più bravo nel balon,
la più bela, el più gentile,
e far la proclamassion...
In realtà quelo che conta
no l’è mìga quel che val,
ma sol rastrellàr tagliandi
comprandose el giornàl!
Gh’è un zugador paesan
del Camacici o del Raldon,
nel Pai, nel Vangadissa,
nel Vago o nel Castion
che l’è strasso da paura,
che l’è ’nsoma un gran bidon,
e la bala el le pessàta
solo con el pontalon?
No importa! Se de quei tagliandi
el ghe n’ha za sento al caldo,
el pol essar proclamàdo
più brao ’nca de Ronaldo!
Gh’è gran foto de le Miss
con le ciàpe par de fora
“per far emerger la cultura
sia de sotto che de sora”...
E gh’è na vecia carampana
co gambe storte e sensa denti?
Non importa! La pol vìnsar
se la g’ha tanti serventi
che i tagliandi del giornàl
dappartutto i cata su,
fra i amici, al bar, in ciesa,
o davanti a la tivù!
E gh’è un commesso insemenìdo,
vilàn e strafottente,
che ’l trata a pessi in facia
ogni specie de cliente?
El pol diventàr istesso
el “commesso più ideal”!...
Basta sol che ’l fassa incetta
dei tagliandi del giornàl!
Insoma, l’unico sistema
par vendar più giornài
par sia esaltàr i incompetenti
a dispetto dei più brài!
E quel che infine i ne propone
l’è la derision del merito!,
e, par du tri copie in più,
l’esaltassione... del demerito!