La pistola sul comò

Dopo aver puntàdo tutto,
fra un proclama e na promessa,
su l’impegno de risolvar
el problema sicuressa...
dèsso el Sindaco-sceriffo
ha dichiaràdo, proprio ancò,
de tegnerse sempre pronta
na pistola sul comò!,
sempre pronta par sbaràr,
colpo in cana, sempre sveja,
contro chi porìa rivàr
a spaentàr la so fameja!
“Se lo Stato no l’esiste
e continua a no far gnente,
ghe penso mi col me revolver
fermàr ogni delinquente!
Meti solo che lo vedo
azardàrse a vicinàr,
mi ghe sbàro du tri colpi
e lo lasso lì a cainàr!”
Così el dise con orgoglio,
la pistola sul buffeto,
co la man za bela pronta
a macàr su quel grileto!...
Ma pensa ti se, sul so esempio,
tanti altri andasse armà
par difendarse da quei
che sassìna la città!...
e se un cittadin qualunque,
innamoràdo de Verona,
la so idea po ’l ghe copiasse
de difendarse a la bona...
se ’l tolesse na pistola
par proteggiar la fameja
da quei barbari feroci
che, ogni volta che i se sveja,
i progetta novi assalti,
furti e gran devastassion
e po’ i lassa sol rovine
co incursioni de scondon:
i vol sassinàr l’Arena,
tutti i albari copàr,
sotterràrne de cemento,
altri colpi ognor studiàr!
“Se ’l Comune el ghe dà corda
e continua a no far gnente,
penso mi co sta pistola
fermàr ogni delinquente!
Basta solo che lo veda
azardàrse a vicinàr,
mi ghe sbàro du tri colpi
e lo lasso lì a cainàr!”
Par fortuna che al momento
no l’è ancora mìa successo,
ma “l’esempio che trassìna”
el porìa far dani istesso!
Par difendarse dai barbari
che ne insìdia la città,
bastarìa do tre pastiglie
d’inteligensa e civiltà...
e tegnèrle sul buffeto
pa’ ogni giorno al dì d’ancò...
no pol far de sèrto mejo
na pistola sul comò!