La cultura del dispetto

El dibattito a Verona
tante volte, a ben vardàr,
no l’è mìa un incontro serio
’ntorno a quel che gh’è da far,
ma ’l confronto democratico
l’è ancò diventà, in effetti,
mìga un scambio de opinioni,
ma la sagra dei dispetti!
Tante volte cì contesta
no ’l le fa in nome de l’arte:
solo el critica impudente
chi no sta da la so parte!
Quei che aveva inauguràdo
in pressia la funicolare,
dèsso irride quei che inaugura
fin la piassa de so mare!
E proprio quei ch’avea promesso
un fantastico Arsenale,
un gran tetto par l’Arena,
el cimitero verticale,
contro quei che i l’ha scalzàdi
se la tol violentemente,
e sensa più podor denuncia:
“Questi proprio no i fa gnente!”
E i contesta quei che adesso
i ha boccià con decisione
la sempiàda eccessionale
de la rùda in via Pallone...
“che – ne conta – l’avrìa reso
i nostri giorni manco grigi!
No par gnente i l’ha za fata
anca a Londra, ’nca a Parigi!”
(che l’è vèra, ma par sèrto
là i l’ha fata, a dir el vero,
con un gran bel panorama,
no “con vista cimitero”!)
E i contesta che la Giunta
l’abia scelto fora via
che qua a far ’l sovrintendente
ghe sia dèsso la Gasdìa!
E i protesta: “L’è stà scelta
no parché la sia n’artista!,
ma parché za a le elessioni
l’era dentro la so lista!”
(e l’è vèra, ma no i parla
de le competense bele...
quando el so perito agrario
ghi n’avea fato manèle!)
El giornàl, che da gran tempo
solo de “veline” el campa,
sensa alcun commento ascolta
quel so gran addetto stampa...
e qualunque gran sempiàda
el scrive soto dettatura,
diffondendo con ossequio
del dispetto la cultura!