Invocassion

Partiti, gruppi, associassioni
tutti i è in fibrillassion
par catàr un novo Sindaco
che ghe vinsa le elession.
I se inventa e i sbàra a turno
“nomi nuovi” e nomi usati...
Ogni giorno che ’l ciel manda
spunta novi candidati!
“Questo l’è d’alto profilo”
“Qual profilo? El g’ha la pansa”
“Questo no ’l va mìga ben”
“Ghe vol uno de sostansa”
Ma no par che i vada in serca
de cì emerge par valori:
tutti pensa a sostegner
cì va ben solo par lori!
Fatto sta che solo resta,
a la fine, da ste beghe
na girandola de nomi
che sol pensa a le careghe!
Ma no se capisse mìga
cosa dopo uno el farà!,
che progetto el g’abia in testa,
che vision de la città...
ché da destra e da sinistra
i proclami e le promesse
lì buttàde a scotadeo
gira e gira, i è le stesse:
na città “verso il tremila!”
“per i giovani un lavoro!”
e turismo! e sicuressa!
tanto ordine e decoro!
Tutte robe za sentìde
in discorsi ripetuti,
sì generiche e confuse
che pol ’ndàrghe ben a tuti.
Mi vorìa parole ciare
e la voja de cambiàr
quela strada svergolàda
che i n’ha fato za ciapàr:
sensa albari e prà verdi,
inquinàda e invelenà,
piena de supermercati,
de quartieri incementà,
de turisti imbidonàdi
solo par spilàrghe i schèi
con i falsi più pacchiani
a dano dei siti più bei..
co l’Arena minacciàda
da un’insulsa copertura,
e la lirica copàda
dispressando la cultura!
Basta co le idee balenghe...
el statuon piantà in colina,
tutti i morti impilonàdi
perché ’l smog el ne sassìna...
Riconquistemo l’Arsenale!,
coi so albari, el so verde,
le parole del teatro
che ne l’aria se disperde...
Disì ciaro, qua! a sto punto,
quel che po’ voressi far!
E po’ alora finalmente
savaremo cì votàr!