El paese dei balocchi

A la facia za de le proteste
qua de tanta brava gente,
preoccupà che ai nostri fioi
no i ghe infìla ne la mente
idee stranie, falsi miti
che pol portarte a la rovina,
che te fa sognàr le stele
e po’ dopo i te sassìna,
ormai za in tanti quartieri,
dentro e fora la città,
sfavillanti sale gioco
con cinismo i ha impiantà!
... con effetti strabilianti
par ficàrse nei servèi,
con “mascìn” sofisticate
par ciuciàr sempre più schèi!
E i le piassa giusto aposta
de le scole proprio a rente,
par sercàr che anca cì studia
el deventa deficiente...
par trattàr i buteleti
come ancor novi Pinocchi:
“Vegnì qua, vegnì de corsa!
Gh’è el paese dei balocchi!”
El Comune el lassa far...
D’altra parte, i è quei stessi
che po’, par catàr su un franco,
i ne tol ognor par fessi!
Par giustificar – esempio –
el progetto demensiale
de ciapàr qua tuti i morti
e impilonàrli in verticale,
no i n’ha dito, no: “El ne serve!
l’è un’idea sol come tante”...
bensì: “Questi qua i n’ha oferto
una cifra interessante!”
... come a dir: basta che i paga,
e uno qua ’l pol far de tuto!,
anca pituràr l’Arena
o anca cuerzarla del tuto!
E anca el Stato, dove tanti
vive sol de paroloni,
el farà da biscassier!,
par ciuciàr dei bei soldoni
a la facia de miserie,
d’educassion e de cultura,
de saggessa laboriosa,
de salute e de misura...
ché gh’è anca cì se mala!...
E, par sta nova malatìa,
i ha inventàdo un nome novo:
i ghe dis “ludopatìa”!
Cosa el sia in realtà sto “Ludo”
te pol capìrlo za a la prima:
l’UDO è quelo che g’ha in testa
cì permette... sta rovina!