El novo ciucioto

“Ti ghe sìto su feisbuk?”
così za a prima vista
i te domanda, bramosi
de metarte in lista...
E te te cati obbligàdo
a contàr tutto de ti:
qualsiasi sempiàda
che te fassi ogni dì...
e contar anca quelo
che altre volte te tasi,
par permettar ai altri
de mettarghe i nasi...
“Sto andando a Lazise”
“Gh’è vento o gh’è ’l sol?”
“Se stanotte rinfresca
dormirò col nissol”
“Ho visto la Gina”
“Qua gh’è pronto el disnàr”
“G’ho un brufolo al naso”
“Cosa gh’è da magnàr?”
...e, fin che te scrivi
“La polenta col pocio”,
i g’ha la sóddisfassion
de tegnerte de ocio...
E gh’è dentro ’nca Internet...
“g’ho in man tuto el mondo!
Qua gh’è scrito par sèrto
se l’è quadro o l’è tondo!”
Ma ti pensa che gusto!
Te pol saver quand’è stàdo
che è nato quel tale,
che quel altro è sbrissiàdo!
E... “Se catemo stasera?,
par esempio a le nove?”
“No, parché qua gh’è scrito
che a quel’ora po’ piove”
... se porìa metar el muso
fora dà la finestra...
ma l’è Inter-Nèt che comanda
quala l’è la minestra!
E tutti, obbedienti,
come un bravo butìn
che l’è sempre tacàdo
al so zùga...tolìn,
i se tien sempre streto,
sia de sora o de soto,
la nova Bibbia de adesso,
el so novo ciuciòto!