Na storia de ancò

Flavio-Enrico: d’anni e anni
sempre insieme, sempre uniti!
I se appoggia l’un co l’altro,
tante volte riveriti...
Sempre insieme te li vedi,
che i promete o che i se vanta,
a tute l’inaugurassioni
e a le conferense stampa.
I è ’ndà insieme a presentàr
colonnine de soccorso,
mercatini, cioccolata,
a contàr quela de l’orso...
I avea insieme presentàdo
anca el bus dìto “antisballo”,
che ’l dovea raunàr balenghi
prima che cantasse el gallo...
(sol n’idea butà zo a caso
par intorcolàr la gente
e farse un fià pubblicità...
po’ no i ghe n’ha fato gnente!)
... e le ronde, el cimitero,
e la statua de Giulieta,
el pedaggio da pagar,
el restauro de la teta...
E i ha ’l filobùs ’nunciàdo
streti insieme al capomastro,
quando gh’è in realtà, de pronto,
sol le fòrbese col nastro!
E insieme i conta che ’l traforo
l’è za belo pronto a l’uso!,
e, dopo aver sognà le canne,
i vagheggia adesso el buso...
e, credendo i cittadini
forse un poco deficienti,
i ne conta ste visioni
proprio come due veggenti!
Uno l’è deventà Sindaco,
l’altro insieme ’l so Assessor...
sempre pronti a spalegiarse
l’un co l’altro con calor...
El sarà fòrsi par quelo,
par salvàr sto sodalissio,
che un bel giorno a l’improviso
el bon Flavio, a precipissio,
su “la coppia” l’ha deciso
che bisogna, dìto e fatto,
sostegnerla in tuti i modi
quando... coppia l’è de fatto.