Incomunicabilità

“In teatro, ieri sera,
vegner vèdarte volea...
ma son dovù restàr a casa:
voleo vègner, ma piovea!”
“No, ma varda che iersera
in realtà no è mìa piovù!
La commedia l’emo fatta:
spettatori, sento e più”
“Impossibile! Su Internet
gh’era tutte nuvolete!
Gh’era scritto che piovea
anca con fulmini e saette!”
No gh’è verso che ’l capissa,
no ’l se arrende a la realtà!
Solo quela ch’el g’ha in man
l’è par lu la verità!
Una volta, par saver
se piovea o se gh’era bel,
bastava vèrzar la finestra
e dàrghe po’ un’ociàda al ciel!
Ma adesso in tanti s’ha convinto
d’aver nel so telefonin,
proprio dentro, tuto el mondo
da lontan e da vissin!...
e con spavalda frenesia,
come pegoroni in fila,
se tien stretta ogni momento
la so... bibbia del tremila!,
che assicura: “piovarà
a le diese da Raldon,
da le sette a Vangadissa,
a le sinque a Bovolon!”
Tante volte ste “notissie”
i è in realtà sbaglià de bruto:
le sconfonde el mar col sol,
el bagnàdo con el sùto!
Ma, bituà tutti a dipendar
da quel schermo malandrin,
nessun dubita ch’el possa
sbagliàr gnanca un cincinin!
E no se usa più, par strada,
andar spassionatamente
sercando dei confronti
ne le facce de la gente:
tutti gira co oci bassi
puntà sul telefonin,
el so idolo, el so mondo,
el so bel zugatolin!
E nessun più serca, sui giornài
d’ancó, le prose più eleganti,
ma quele scritte in picenin
co le sigle fuorvianti,
che te fa bevar de tuto
come da tri quattro goti,
mescolà con salatini
infarcì de becanoti...
I ghe ciama, a sti strumenti,
“di comunicassion”...
ma, se te vardi ben in giro,
te rivi a n’antra conclusion,
e te capissi chiaramente
cosa mai che i sia in realtà:
de tutt’altro i è strumenti:
incomunì... cabilità!