El sfruttamento

È tornàde de sti giorni
– e ormai tutti se le speta –
le polemiche mensili
sul balcone de Giulieta!
Intanto: dopo gran proclami
fatti pa’ intortàr la gente,
puntuali, come al solito,
no i ha fato ancora gnente...
Ma sui accordi za ’nunciàdi
è intervegnù l’opposission,
sostegnendo: “Sto progetto
no l’è mìa na solussion!
El Comune, combinàda
co sto “Mox” na gran manfrina,
el finirà par guardagnàr
forse manco anca de prima!”
Come sempre se qualcun
ghe fa qualche osservassion,
l’Assessora, permalosa,
la fa quasi un rebalton!
La se sveja dal letargo,
la se mete tosto in moto,
la fa el muso, la scancèla
i sorrisi de le foto!.
“Sono accuse strumentali!
Non mi vanno proprio giù!
Il Comune con sti accordi
guadagnerà sempre di più!”
“Non è vero! – fa quei altri –
E tanti ingressi in via Cappello
renderan vieppiù la strada
un orribile bordello!
Come al solito il Comune
– è ormai storia, mito, saga –
si è venduto per denaro!:
qua sol basta che uno el paga!”
“Non è vero, siamo attenti!
Negativo qua era il trend!
La gestione abbiam venduto,
ma poi noi teniamo il brend!”
E l’è za pronta a ripescàr
la sempiàda a tutto tondo
che ’l sarìa, sto liogo streto
“el più visitato al mondo”!
... come se a Parigi, a Londra,
o in tuti i posti più osannati
al confronto con noantri
ghe andasse solo quatro gati...
E i continua a costionàr
sensa mai dàrghe un’ociaà
ai valori culturali,
a la veridicità...
E se capisse qualo el sia
el messaggio culturale,
e la “mission” più importante
pa’ l’Amministrassione comunale!
I avrà pensà: na casa chiusa
in do’ gh’è dentro... l’eroina!
e gente stramba vien sercàrla
da la sera a la matina!
e tuto intorno un gran bordèl!
E, come un orda maledetta,
tutti insieme alora i sìga:
dai, sfruttemo la Giulieta!