No gh'è verso... di Roberto Puliero
stampa

El rimpasto

Parole, pensieri, a ruota libera dell'istrione Roberto Puliero

I s’aveva fatto eleggiar
pa’ “ministrare la città!”,
l’avea ’l Sindaco in gran pompa
la so Giunta presentà!
Ma s’ha po’ ben visto ciàro
che i ne trata come alochi...
e la Giunta sì esaltàda
pian pianìn l’ha perso i tochi!
Par primo ’l vicesindaco,
sempre in testa a l’oratorio,
l’ha scombinà i pastròci...
e finìdo l’è a Montorio!
No ’l se ne impìpa ’l Sindaco:
“Sì, va ben, qualche tangente,
ma lu l’ha fato tanto!,
con coràjo!... l’è inocente!”
Po’ – mistero! – quel del Spòr
el dà qua le dimissioni...
e dopo: “No! No i ho mìa date!...
I era solo riflessioni!”
Riva po’ le Regionali,
e... ’sa ne importa de Verona?
Par sèrto l’è, in Regione,
più importante!, la poltrona!
E ’l novo vicesindaco
el se càndida in gran pressia:
qua de corsa el mola tutto,
par sentàrse zo a Venessia!
Ma invesse quel del Traffico,
che za el Sindaco par ani
el s’avea portà a brasseto
par nunciàr... tuti i malani,
sol par essar stà coerente
co la linea del partito...
el l’ha cassàdo via de bruto,
rimandàdo a casa drito!
No gh’è quasi più nessun...
le bugìe più no le taca:
la Cultura l’è vacante,
a lo Spòr va tuto in vaca,
come al Traffico, al Comercio,
fin al zugo de le picie...
e la Giunta l’è spolpàda,
e no gh’è più gnanca el Vice!
E ’l rimpasto za anunciàdo?
“Lo faremo certamente,
però solo a bocce ferme!
Su, su, dai, sté chieti, gente!”
In realtà ’ncora le gira...
sol na roba è ciara, e basta:
al rimpasto pol rivàrghe
sol cì g’ha le mane in pasta!
Mai la Giunta più no riva,
e za a tutti è ciàro ormai
che, sì, i sèita a dirghe Giunta
ma po’... giunta no l’è mai!

Tutti i diritti riservati
El rimpasto
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.