El Poro Senko e el poro Tosi

È passà za quasi un ano
da quel dì che i n’ha robà
tanti gran capolavori
del bel tempo ch’è passà...
Fatto sta che da l’Ucràina
na notissia un giorno riva:
“Chieti, gente! Emo za tuta
recuperà la refurtiva!”
Senonché po’, visti i quadri,
“Ben, però... za che ghe semo
– in un attimo i ha dito –
quasi quasi se i tegnemo!”.
E i ghe fa na bela Mostra!
“Varda ti come i è bei!
Se i tegnemo n’antro poco,
se pol fàrghe un po’ de schèi!”
E a chi rivàva da Verona
de scapon, tutto agità,
i g’ha dito: “Adesso speta!,
parché intanto i resta qua!”.
“Ma i è nostri! I è robàdi!
Proprio quei! Vardèli ben!”
“Da da da...” dise i ucràini,
... e po’ dopo i se le tien!
... E l’è come se al sior Tale
i ghe roba la parcèla,
e chi a caso po’ el le cata
’l se le fica zo in scarsèla!
... come se quel che le cata
el g’avesse la pensàda
de andàr dentro un ristorante
e de farse na magnàda!
Ma i nostri baldi difensori,
come alochi in soggession,
invesse un poco de impontarse
i se g’ha messo in zenocion!
E po’ el Sindaco par zonta,
con na mossa temeraria,
el g’ha dato a Poroscenko
citadinansa ’nca onoraria!
Dèsso gh’è un ambassiatore
che assicura: “I rivarà!”
... ma lo stesso l’avea dito
anca du e tri mesi fa!
E po’ quando? Come i riva?
No se sa gnan dove i sia!
“Gh’è de mezo grandi Stati...
Ghe vol la diplomassìa...”
Fatto sta che or, de sicuro,
gh’è sol na testimoniansa
qua de un’Amministrassìon
sensa ciucio né sostansa:
e l’è la foto che ne mostra,
impilonà come du sposi,
co la fassia tricolore
el Poro Senko e... el poroTosi!