... anca l’isola!

Continua le proposte
(chi ghe n’ha, più ghe ne meta!)
par seitàr col sfrutamento
de la “Casa de Giulieta”!
Dopo el falso de la Tomba,
dopo el falso de la Casa,
dèsso i s’ha inventàdo... l’Isola!
... e che la storia ’ncor la tasa!
I avea discusso sul bilieto,
su l’ingresso, su l’orario...
dèsso i furbi i ha pensàdo
a tutt’un itinerario
fra i palassi lì vissìni,
par far vedare a la gente
tutte case che con Sespir
no le gh’entra proprio gnente!
... e par portàrli infin al Novo!,
in do’ (compreso nel bilieto!)
far che i visita el Teatro,
che i ammira quel palcheto,
quele corde drìo la scena,
quei pannelli carolà...
par vardàr la smeraveja
de poltrone scalcagnà...
E i vorìa, par tuto questo,
el patrocinio del Comune!,
che ormai làssa far de tuto
a seconda de le lune...
Sicchè ormai, fra tante idee
ogni tanto sbandieràde,
se spetemo ormai de tuto...
cissà ancor quante sempiàde!
Manca solo che in sta Isola
po’ i ne conta co un sorriso
che un doman i farà lì
fin la Sagra ’nca del riso!
... che la Standa un qualche giorno
la ne annuncia con sorpresa
ghe Giulietta tutti i giorni
va da lori a far la spesa!
... e che, a contàr qualche sempiàda,
se ghe metta anca Coin...
co la scusa che Giulietta
la sta proprio lì vissìn!
Manca solo che un bel giorno
tutti quei che lì ghe magna
se organizza lì un cenone
par gustarse la cuccagna
de sto imbrojo che da anni
se rinnova co impudensa
par cì riva innamoràdo
buzarà sensa decensa...
Dèsso intanto in quela casa,
fin che ancor la pacchia dura,
no l’è morta mìa Giulietta,
ma l’è morta... la cultura.