Tuti stretti in posa

A vardàr ben, de sti giorni,
quel che i scrive sul giornàl,
par che gnente più importante
ghe sia, qua, del Carneval!
Ghe sarìa da preoccuparse
del futuro de l’Arena,
par i busi nel bilancio
e ne le strade che fa pena,
parché ’l traffico inquinàdo
de veleni el ne tortura,
che ’l balcone de Giulietta
el sia scambiàdo par cultura...
Ma i più grandi paginoni,
e le foto più eclatanti,
ogni giorno è riservàde
tutte pa’... i Carnevalanti!
... pur se ancó del Carneval
l’identità l’è andàda persa:
el voleva dir, na volta,
solo... “el mondo a la roèrsa”!
Se podea anca tor in giro
cì ne mette soto i pié,
e pa’ un giorno anca ’l pitoco
el podeva farse Re!
Ancó invesse a cì comanda
i è le mascare ossequienti,
e i fa a gara pa’ esaltàr
e omaggiàr i più potenti!
I se premura de invitàr
e politici e assessori,
portaborse, leccapié...
e i le fa sfilàr con lori!
E ne le foto, stretti in posa,
pa’ essar visti tutti in gara,
gh’è ogni dì quei de la Giunta
co la Corte Gnocolàra...
e anca ’l Sindaco, el so Vice,
cì comanda ancó a Verona,
con el Duca, el Reboano,
de la Renga la Parona,
Pa’ del Gnoco col so musso
za scambià par n’assessor,
Re Saltucchio, Re Goloso,
dio de l’Oro in gran slusor...
Co le panse i urta el nastro
a tutte le inaugurassioni...
da na parte o da quel’altra
i è vissìne le elessioni!
I veci sogni i è sparìdi...
el mondo no ’l s’ha più roersà:
el potente ancor comanda,
el pitoco... l’è restà!,
coltivando l’illusion
che assessor sia... un Reboano!
... e magari l’è la volta
che ’l farìa ’nca manco dano!