Spiegassioni pilotàde

Quando un dì, l’altra giornàda,
emo perso a Benevento,
la tristessa più rabbiosa
l’ha ciapàdo el sopravvento...
e ormai tutti s’ha convinto
– gh’è rivà tutti fin lì –
che ’l Verona ormai par sèrto
l’è finì za in serie Bi!
E i tifosi, smocolando
e soffrendo come i usa,
i s’ha visto sol rovine
d’una val che ormai se brusa:
anca Fusco, el Direttor,
co un corajo da leon,
disendo: “No, non è una fuga”
... l’è scapà de ropeton!
E tutti ancora a s-cervelàrse
par catàr la spiegassion
del disastro de la squadra,
e de sta retrocession...
e saoni e grandi esperti,
pronti solo a l’obbediensa,
i ha sfodrà solo i motivi
dettà da la conveniensa!...
e, sfoderando paroloni
che i capisse solo lori,
i indivìdua l’obiettivo...
e mete in croce i zugadori!:
“Sono un branco di sbandati
senza orgoglio e senza cuore!
Sono imbelli, vergognosi,
non si batton con furore!
Sono dei menefreghisti,
della gente traditori!,
che non hanno alcun rispetto
della storia, dei colori!”
(quai colori? L’è petrolio
el tanto caro vecio blù...
e ’l giallo ormai l’è diventàdo
color verde butà su...)
Ma in realtà, a contàrla giusta,
se la squadra casca in tochi
no l’è mìa parché i scantona:
i è, poareti, solo brochi!
E no gh’entra la passione,
e l’onor, la dignità...
se i fadìga così tanto,
no è question de volontà!
Se i par sempre impilonàdi
e po’ in campo i fa pietà,
no l’è mìa parché no i vol:
l’è parché no i ghe le fa!
E no gh’è da condannarli,
da tiràrghe dosso i sassi!
No gh’è mìa da vergognarse
d’essar solo un poco strassi!
Ma la gente, da condanne
ben studiàde imbidonàda,
la lession più elementare
la se l’ha dismentegàda:
che la stampa di regime,
sempre prona ed ossequiente,
la pol dar la colpa a tutti,
ma no sèrto al Presidente!