Quando fioca...

Quan’ na volta nevegava,
pa’ i bociassa era na festa!
Se beveimo el caffelàte
za co la bareta in testa
ben fracàda su la fronte,
con de lana el so ponpon
che ’l fasea da sentinèla
e po el stava in pingolon...
E la mama ne imbottiva
de sciarpete e de majoni,
ne cuerzeva le caùce
con dei veci calsettoni
pronti, pur con qualche buso,
ai scarponi a far da zonta,
larghi come du scialùpe,
ma con del bombaso in ponta!
Na fameja sensa un’auto
no che fusse demodè...
ma par tanti era normale...
bisognava andar a pié!
E proprio quela era la festa!
ché la strada diventava
pista lissia e sbrissiarola
par le braghe a la zuava,
gioia e campo de batalia,
sbalocàde de allegria,
de gran sìghi risonante
impenì de fantasia!
Po’, rivà de corsa a scola
con i guanti imbombegà,
se corea ai termosifoni
con i diei tuti ingiassà
fin che intanto la maestra,
coccolandone col sguardo,
con severità sforsàda
ne scusava del ritardo.
E po’ la tacava dolce
a spiegarne che “... la neve
lenta cade sonnolenta
e si posa lieve lieve...”
E za l’ocio ne sbrissiàva
a controlàr se i bianchi fiochi
n’avarìa ’ncor conservàdo
quel paese dei balochi...
za sognando imboressàdi,
su la strada del ritorno,
le rivincite gioiose
da gustàr par tuto el giorno.
Adesso qua che de sti giorni
tanta neve l’è cascà,
è rivà da l’alto un ordene:
che le scole sia serà!
... parché ’l traffico intasàdo
pol bloccar tuta Verona!
Gh’è strumenti ultramoderni
che se incanta e no funsiona!
E alora, disabituàdi
che i motori un poco i tasa,
ancó costretto emo i butìni
a star tutto ’l giorno in casa
no a vardàr da le finestre
el bianco incanto dei giardini,
ma a star lì coi oci bassi
cucià sui telefonini!