Nessuna paura!
Parole, pensieri, a ruota libera dell'istrione Roberto Puliero
L’è diventà de moda,
fra politici e dottori,
de zugàr con le parole
e capirse sol fra lori...
sicché tutti ormai se crede
de no far nessun pecato
se, parlando, a le parole
ghe cambia el so significato.
Da quando, de sti tempi,
dei viliàchi terroristi
sassinàdo i g’ha la vita
a tanti poricristi
passando con i camion
in mezo a tanta gente
parché de l’innocensa
no ghe ne importa gnente,
politicanti de ogni dove,
opinionisti e gran saoni
giustamente ha proclamàdo
con dei gran paroloni:
“Non dobbiamo aver paura!,
né star sempre sull’attenti!
Sarebbe darla vinta
a quei quattro delinquenti!
Continuiam la nostra vita
esattamente come prima!
Non è cambiato niente!,
ma gnanca na s-ciantina!”
Dìto questo, i ha impenìdo
la città de gran barriere,
i ha fabricà dei muri
stravolgendo le fioriere,
i ha cancelà de bruto
fior de manifestassioni,
i ha studiàdo dove metar
par difesa dei cannoni,
i ha impenìdo i monumenti
de cemento rinforsà,
i ha bloccado tuti quanti
qua i accessi a la città,
i ha circondà i butini
che zugava al “Tocatì”
con soldàdi con el mitra
dislocàdi proprio lì...
E, dopo tanti piani
preparàdi con gran cura,
i ha ridìto con orgoglio:
“Qui non abbiam paura!”
