Le parole e i fatti

Tutte quante le opinioni
le dev’essar rispettà:
le pol essar le più strànie
le vision de la cità.
Ci le vol piena de verde,
de aria bona ogni momento,
chi la vol co ultramoderni
casermoni de cemento…
Gh’è cì crede sia importante
solo far supermercati,
chi vorìa darghe na man
ai pitochi e disperati…
chi vorìa con mile sagre
intasàr ben ben la Bra,
chi vorìa passeggiàr chieto
e no sa più come se fa…
chi vorìa che ancor la lirica
fusse el fiore de Verona,
quei che dise: solo el rock
par far schèi ancó ’l funsiona!
Chi vorìa ’mbrojàr turisti
par ciuciàr sempre più schèi,
chi vorìa sercàr, fra i siti,
in silensio quei più bei…
Ma se i pensieri, le parole
i pol ’ndàr in sbrindelon,
invesse i fatti i parla ciàro
sensa imbròj o discussion!
Dèsso el sindaco ’l ne conta
che “non basta un depliàn
per dir quel che abbiamo fatto
in quest’anni qua d’antan!”
Ma in realtà, vardando ben
e tutto quanto esaminato,
gnanca un libro bastarìa
par dir quel che no i ha fato:
no el traforo, el filobùs,
el cimitero verticale,
gnente lotte contro el smog,
no le Ronde o l’Arsenale,
no un bilancio sistemàdo
par la lirica malàda,
gnente Emporio a Veronetta,
sicuressa sbandonàda…
No i ha fatto (manco mal!)
gnanca el cuèrto de l’Arena,
no tettoie par Via Nova
(che la sarìa stà na pena)…
no la via funicolare,
gnente rùde in Via Balon,
gnente Casa de Giulietta
sensa ciunghe sul porton…
Struca struca, cosa hai fato?
Le panchine co la sbara,
la proposta, contro i lupi,
de sbaràr co la lupàra…
de portàr un statuon
impilonà su la colìna…
de far po’ giràr sul fiume
dei barconi che camina…
Mi no so ’sa ghe sia scrito
in quel famoso depliàn…
ma de sèrto quel ch’i ha fato
l’è stà solo… un gran cancan!