La smania de l’inaugurassion

Quando i amministratori
– quei de prima e quei de adesso:
no gh’è mìa gran diffarense,
struca struca po’ l’è istesso –
i vede possi...bilità
de far n’inaugurassion,
no gh’è scampo, sta sicuro
che i ne va in fibrillassion:
i se agita, i trapèla,
i se mette tosto in moto,
co la smania de apparir
e de farse far le foto...
E i se lustra ben le fòrbese,
i se stira ben el nastro,
i se esercita coi diei,
e po’ i ciama el capomastro
par essar ben sicuri
che tutto sia za pronto,
e... quel che no l’è a posto
che se lo tegna sconto!
Parché l’è questa la tendensa
de cì g’ha in man Verona:
de inauguràr le robe
quando ancor no le funsiona!
Vardè sol cos’è successo
za con la funicolare:
ghe mancava poche ore
al momento elettorale,
e in gran pressia e co gran pompa
i l’ha inaugurà de bruto!...
Solo dopo s’emo incòrti
che mancava ancora tuto!
Ben: pa’ inauguràr adesso
la biglietterìa AMT,
pronto un s-ciàpo de politici
puntuali i è andà lì
tutti streti intorno al nastro
a sorridar fra i urtoni,
a esaltàr el “novo” impianto
con promesse e paroloni!
Ma, finì discorsi e foto,
in realtà po’ s’ha scoperto
che l’è ancora, par esempio,
l’atrio, un cesso a cielo aperto:
un stanson sensa decoro,
na latrina, un dormitorio,
un rifugio par balordi,
un luamàr de refettorio!
E manca ’ncor le pensiline
par cì g’ha da stàr spetàr
el so bus fin sotto l’acqua
ingiassàdo lì a tremàr...
Ghe vorìa dei carteloni
che spiegasse ben i orari,
i ritardi, le varianti,
le corsìe, i itinerari...
Però intanto, in qualche modo,
i l’ha bela inaugurà!...
e, contenti, in municipio
i è tornàdi a star sentà!
... parché a lori no ghe importa
se in realtà po’ l’è un disastro:
importante è che sia pronte
sol le fòrbese col nastro!