La funsione preventiva

A ogni conferensa stampa
ogni volta el Comandante
con serietà ’l pronuncia
sta frase assé importante:
“Una multa, o cittadini,
non vuol esser punitiva!
Si porta solo appresso
la funzione preventiva”.
... come a dir che sol la serve
a educarne po’ in realtà,
a insegnàrghe ai cittadini
a circolàr con civiltà...
Senonché dopo succede
che in Comune, dito e fato,
a la parola “preventiva”
i cambia ’l so significato!
E l’è quando che i se cata,
con intemerato slancio,
riunìdi in Commissione
par discutar del bilancio:
l’è lì che i tira fora,
pur con fare un fià furtivo,
con gran serietà e sussiego
la parola “preventivo”...
cioè: i fissa un obiettivo
che bisogna rispettàr,
e po’ i studia, par centrarlo,
quanti schèi bisòn ciuciàr!
e i sguinzàglia dapartuto
tanti vigili addestrà,
sparpajà par imboscate
fin in tuta la città...
e i le manda in ogni dove
a multàr alegramente
dove ognor più numerosa
se raduna tanta gente!
Se a la fin, però, i s’incorze
che la cifra prefissàda
no l’è mìga stà raggiunta
e la resta sol sognàda,
sconsolàdi i se lamenta,
e i ne annuncia: “Che pecà!
Che tristessa! Ancò a Verona
gh’è gran poca inciviltà!”
... sassinando alegramente
el valor de le parole,
sconfondendoghe i princìpi
ai butìni e ’nca a la prole.
Chè ’l so sogno l’è in sostansa
de ciuciàr sempre più schèi
rispettando un preventivo
fatto aposta, fra i più bei!
... e poder po’ ribadìr,
co aria anca un fià giuliva,
che l’è, quela de le multe,
sol “funsione preventiva”.