L’amore trionfa

In sti giorni con orgoglio
i nostri amministratori
i se imbroda, i se entusiasma
e i se vanta fra de lori,
e i annuncia con gran pompa,
con discorsi e parolon,
che a Verona ancora riva
na gran manifestassion:
torna qua “Verona in lav”!,
con nomèa internassionàl!
... e impudenti za i le spaccia
par evento cultural!...
ché gh’è mile apuntamenti,
tutto el tempo che la dura,
tutti quanti in abondansa
impregnàdi de cultura:
“Skattakiss”, e “Palpatet”,
le “Ricette con il cuore”,
e po’ “Selfi”, “Ai lav kid”,
e po’ ancor “Soffi d’amore”,
“Lidl in lav”, “Notti di luce”
da tiràr fin a bonora...
Se poarà compràr de tuto
e basàrse par un’ora...
la “Cenetta con candela”,
il “Canto de l’innamorato”,
la magnàda fatta “in lav”
col buffetto incorporato,
e “Aperitivo su la tore”
con la vista spalancata,
mostre con degustassione
de miolete e cioccolata...
Sì, va ben... ma la cultura?
“Ogni ora, ogni momento
ci son visite guidate
dell’amore al monumento!:
gh’è la Casa Capuleti
con el rito de la teta!,
par finìr po’ in allegrìa
con la Tomba de Giulieta!”
( i è do falsi colossali
scrimacià in tutti i quarèi,
ma i è stà inventàdi aposta
par ciuciàr sempre più schèi)
E gh’è in piassa bancarèle
dove “un grande cuore alberga”!
... in do’ i rivende le salsicce
avansà dai Norimberga!
Fatto sta che proprio i stessi
ch’i ha lassà morìr l’Emporio,
e che ha fatto de la lirica
solo un tragico mortuorio,
che ha copà sensa rimorsi
el teatro a l’Arsenàl,
parché far supermercati
l’è par lori quel che val,
proprio quei che s’ha inventàdo
le panchine co la sbàra,
che vorìa sbaràrghe ai lupi
col fusìl e la lupara
a la fin i è proprio i stessi
che ogni giorno, con clamore,
i ne ripete con orgoglio:
“La città siam dell’amore!”