No gh'è verso... di Roberto Puliero
stampa

L’Emporio no ’l se fa più

Parole, pensieri, a ruota libera dell'istrione Roberto Puliero

Finalmente l’è sicuro,
gh’è anca l’ufficialità!,
e l’Emporio a Veronetta
ormai più no ‘l se farà.
Tutti i soldi che doveva
portar solidarietà,
causa el tempo che s’ha perso,
i è sparì, polverizà!
Epur no ’l dovea mìa essar
covo sol de dipseràdi,
dormitorio de balordi,
o na mensa par sbandàdi:
’l volea sol vegnìrghe incontro
a chi ha perso tuti i sogni,
a fameje scombinàde,
stofegàde dai bisogni.
Ma a la notissia gh’è cì brinda
col spumante nel seciàr!:
quel che avea sercà le firme
pa ’l progetto bombardàr.
“Che vittoria! – adesso el dise –
ghe voleva la me testa!”
El vol far ne “bicchierata”,
l’organizza na gran festa!
“Dèsso sì che a Veronetta
l’è ’l pericol scongiuràdo:
el quartier risplendarà,
elegante e profumàdo!
No gh’è posto par pitochi
sempre a tèndare le man!...
e se i vol morir de fame
che i le fassa più lontan!
No sta ben che qua i se veda!
L’assistensa? Che i se peta!
El quartier l’è de noantri,
quei co la cossiensa neta!
Sì, gh’è ancora tanti neri
che te passa ’nca de fianco...
vorà dir che ghe daremo
una bela man de bianco!”
Pensa ti che bela festa!...
che lession de civiltà!...
e che impresa coraggiosa
scondar ben la povertà!...
E ci ha ciapàdo i bisognosi
a peadoni nel dedrìo
par un scherso de destin
el se ciama ’nca Di Dio!
Se a cambiàrghe un fià la testa
no se sa mìa quando o come...
par intanto el sarà mejo
che ’l se cambia almanco el nome!

Tutti i diritti riservati
L’Emporio no ’l se fa più
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.