I protetori

In sti giorni ch’è partìda
la campagna elettorale,
ogni tanto con gran pompa
riva un nome... nassionàle!:
n’onorevole, un capoccia,
un segretario de partito,
con codasso de serventi
adoranti arente al mito!
Con aerei o bus firmàdi
i è rivàdi qua da Roma
pa’ insegnàr come se fa
a ben governàr Verona...
E i fotografi za i core...
e i le mete sul giornàl...
le television ne annuncia
interviste eccessionàl!
I è vegnù con tanta pompa
investìdi del mandato
de riussìr con gran discorsi
sostegnìr ’l so candidato...
e del so pupillo i dise,
sproloquiando con gran susta:
“Noi lo conosciamo bene!
Ecco la persona giusta!”
In realtà... no i le cognosse!
No i sa gnanca chi che ’l sia...
ma con sicumèra i dise:
“Lu l’è el mejo che ghe sia!”
E con lu a brasseto insieme
i se fa fotografàr:
l’onorevole, paterno,
el par quasi caressàr
el candidato co la testa
ben piegà verso de lu
(se ’l se piega n’antro poco
i va in tera tuti du!...)
Insoma infin, par dirla tuta,
i è rivà da destra e manca
par promovar candidati
che po’ no i conosse gnanca!
E po’ i scapa in tuta pressia,
ché i g’ha ’puntamento a Roma!
La pubblicità i l’ha fata...
’sa ghe importa de Verona?!
Lo savemo za da un toco
che in campagna elettorale
fra proclami e gran promesse
gira anca tante bale...
che no gh’è onestà, coerensa,
o programmi purchessìa
che no sia ’nca un po’ condìdi
co un fiantìn de ipocrisia...
ma de sèrto gh’è na roba:
come za... sèrte signore,
ogni candidato sindaco
dèsso el g’ha... el so protetore!