No gh'è verso... di Roberto Puliero
stampa

El turista buzarà

Parole, pensieri, a ruota libera dell'istrione Roberto Puliero

Parole chiave: No gh'è verso (170), Roberto Puliero (190), Satira (145)

Lì a la “casa de Giulietta”,
sia d’inverno che d’istà,
preoccupà dise ’l giornàl
che gh’è furti in quantità!
E ogni giorno de la gente
gh’in profìta i lestofanti:
i se mescola ai turisti,
i le imbroja tutti quanti!
Gh’è furbastri de ogni tipo
co oci svej e mano lesta...
gh’è borsette in bela mostra,
e pa’ i ladri l’è na festa!
La notissia l’è annunciàda
con risalto eccessional,
e de titoloni e foto
impenìdo i ha ’l giornàl!
E i è tanti che se indigna,
i se rabia, i g’ha paura!:
“No podemo in faccia al mondo
far così brutta figura!
ché uno riva da Giulietta
pien de fede, innamorà...
e a la fine in du e du quatro
el se catta buzarà!”
Ma... tutti quei che qua s’indigna
no se sa mìa po’ in realtà
se i le fa sol par invidia
o par no essar scavalcà...
parché ormai i è ani e ani
che cì vien qua con amor
lo imbrojemo e lo lassemo
intortà sensa pudor!
Gh’em contà che proprio quela
l’è la casa de Giulietta...
in realtà l’era, lì sconta,
sol n’anonima casetta!
Con tri quattro pilotini
messi lì a la sanfason
emo sistemà un poggiolo
par po’ dir: l’è ’l so balcon!
Gh’emo sluamarà de brutto
tutti i muri de la casa...
e i è ciunghe spussolente
che la gente ormai la snàsa!
Gh’emo ancora fatto credar
che, palpàndoghe la teta,
un amor eterno a tutti
ghe regalarà Giulieta!
E i paron dei negossieti
i trapèla ormai da ani
par dar anca a le mudande
tutti i nomi scespiriani!
E al bon Sespir, poro can,
un regista assè contorto
el g’ha fatto dir de tuto
co la scusa che l’è morto:
visto che ’l ghe stà de fronte,
l’ha pensà: “Pensa che bello!
Mi ghe mescolo ’l Romeo
con l’Amleto e con l’Otello!”
... sicchè insoma se pol dirlo
con orgoglio e con passion:
lì el turista buzaràdo
l’è na vera tradission!

Tutti i diritti riservati
El turista buzarà
  • Attualmente 0 su 5 Stelle.
  • 1
  • 2
  • 3
  • 4
  • 5
Votazione: 0/5 (0 somma dei voti)

Grazie per il tuo voto!

Hai già votato per questa pagina, puoi votarla solo una volta!

Il tuo voto è cambiato, grazie mille!

Log in o crea un account per votare questa pagina.